|
|
Panayam Kay Prop. Jose Maria Sison
Ng Pinoy Weekly
11 Disyembre 2006
Prof Joma,
Magandang araw!
Mabilis ang pihit ng sitwasyong pampulitika sa bansa dahil sa isyu ng
Cha-Cha. Niratsada ng Kamara ang Con-Ass; hindi naman pinalampas ng
taumbayan ang kanilang pakana. Natakot sa ngitngit ng mga mamamayan
ang Malakanyang kaya biglang urong sa pagsusulong ng pagpapalit ng
konstitusyon.
Tanong: Ano ho ang inyong palagay sa ganitong
mga pihit ng sitwasyon?
Sagot: Matagal nang galit ang taumbayan sa rehimen
dahil sa masasamang patakaran at kilos nito. Malakas na udyok ang con-ass
sa taumbayan para magbalikwas laban sa rehimen. Natakot at napaatras si
GMA nang makita niyang tiyak na magkakaroon ng malakihang pagtitipon
sa Rizal Park ang nagkakaisang hanay ng mga pwersang oposisyon sa Rizal
Park bunga ng panawagan ng CBCP. Gayunman, palubha pa rin ang krisis
ng naghaharing sistema. Suklam ang taumbayan sa pagsasamantala at
pang-aapi. Pero desididong manatali sa kapangyarihan si GMA sa pamamagitan
ng chacha at no-elections o sa pamamagitan ng pandaraya sa Mayo 2007
halalan kung matutuloy ito. Lulubha ang hidwaan ng mga reaksyonaryo.
Lalong titindi ang poot ng taumbayan at lalakas ang mga kilos pangmasa
sa larangan ng legal na pakikibaka at ng sandatahang pakikibaka.
Tanong: Bakit po bigla ang pag-atras ng Malakanyang
sa pagsusulong ng Cha-Cha?
Sagot: Nakita ng Malakanyang ang malaking galit ng taumbayan sa con-ass.
Natakot si GMA na nanawagan na ang CBCP ng malakihan at malawakang
paglaban sa con-ass. Lalong lumakas ang nagkakaisang hanay. Lalong natulak
sa sulok ang pekeng presidente.
Tanong: Ano ho ang inyong pagtingin sa tila lumalaking
lamat sa relasyon ng mga miyembro ng gabinete ni Arroyo dahil sa isyu ng
Cha-Cha? Noong una nagbitiw si Sec Avelino Cruz dahil mariing niyang binatikos
ang mga nagsusulong ng cha-cha at tinawag niya itong "hare-brained idea."
Kamakailan naman nagpahiwatig si Sec. Mike Defensor na dapat magkaroon
ng "dose of reality" ang mga tagapagtaguyod ng cha-cha. Iniulat pa ng
PDI na ang pinatutungkulan ni Defensor ang mga taga-Lakas na sina Sec
Ermita, Gabriel Claudio, Sec Raul Gonzalez at Press Secretary Ignacio
Bunye.
Sagot: Lubhang nahihiwalay ni GMA sa taumbayan. Malakas
ang agos ng pagkamuhi at pagsalungat ng taumbayan sa kanya at ito ay umaapekto
at lalong nakakabiyak sa mismong gabinete niya. Mula sa panig ni GMA may
matagal nang nakapagpaabot sa NDFP na may kutsabahan sina De Venecia at
Ermita para isabotahe ang GRP-NDFP peace negotiations at itulak si GMA na
magsagawa ng all-out war policy para masiraan siya sa pagdami ng human rights
violations at mapilitan siyang kumapit sa pakanang chacha ni De Venecia. Ang
problema lang nina De Venecia at Ermita ay pahamak din kay GMA ang chacha.
Mukhang nais ipahiwatig ngayon ni GMA na ang con-ass ay pakana nina De Venecia,
Ermita at iba pang tao ng Lakas sa gabinete.
Tanong: May pagtingin na kinakamada ng Kamara sa pangunguna
ni JDV ang
Cha-Cha dahil nais niyang maging punong ministro at sa proseso tila"hostage" nila si
GMA. Ano hong palagay ninyo rito?
Sagot: Labislabis ang pagkahumaling ni De Venecia sa chacha sa
hangarin niyang maging prime minister. Sa pamamagitan ng GRP-NDFP peace negotiations,
nahalata naming mga nasa panig ng NDFP na ginagawa nina De Venecia, Ermita at
Norberto Gonzales na hostage si GMA. Sinabotahe nila ang peace negotiations para
mapalaban si GMA nang matindi sa kilusang rebolusyonaryo para lalo siyang pumalpak.
Sa gayon, hinila siya nang hinila sa pakanang chacha at sinabi sa kanya na ito ang life
saver niya.
Tanong: Ano naman ho ang masasabi ninyo sa pagbubuklod-buklod
ng iba't ibang grupo mula sa mga relihiyoso hanggang sa mga sosyo-civico na
tumututol sa Cha-Cha? Ano hong maibabahagi ninyong payo upang mapalawak at
mapalakas ang kanilang hanay?
Sagot: Matagal nang umasa ang mga naunang pwersa sa nagkakaisang
hanay laban kay GMA na lalong lalawak at lalakas ang hanay kung aktibong lumahok ang
CBCP. Ngayong ipinananawagan na ng CBCP ang pagkilos ng taumbayan, mahihirapan
ang rehimen na gumawa ng mga panggigipit at panunupil sa mga aksiyong pangmasa
para itakwil ang rehimen. Lalong humusay ang kalakagayan at mga pagkakataon para
isulong ang kilusan para patalsikin ang rehimeng Arroyo.
Tanong: Sa paglawak ng disgusto ng mga mamamayan kay GMA,
magtagal pa kaya siya sa puwesto?
Sagot: Mas madali na sana siyang ibalibag kung hindi umatras
sa con-ass. Pero sa mga susunod na buwan, lalong manghihina ang rehimeng Arroyo
dahil sa paglala ng krisis sa ekonomiya, korupsiyon, pagsunod sa utos ng mga imperyalista
at pagdami ng paglabag mga military at pulis sa mga karapatang tao. At kung mandaraya
muli si GMA sa Mayo 2007, kung matutuloy ang eleksyon, tiyak na mapapatatalsik siya
kaagad ng kilusang masa mula sa kapangyarihan.
Tanong: Ano hong palagay ninyo ang magiging puwesto ng Estados
Unidos sa isyu ng Cha-Cha?
Sagot: Gusto ng Estados Unidos na magka-chacha dahil may mga
gusto itong mabago sa 1987 konsitusyon para sa sarili niyang interes. Ilinahad ko na sa
ilang pahayag kung ano ang mga susog sa gusto ng mga Kano, gaya ng pagsikil sa
karapatang sibil, pagbigay ng "national treatment" sa imperyalistang kapital at
pagpapanumbalik ng mga base militar. Pero kung hindi kaya ng rehimeng Arroyo na
ilusot ang chacha, okay pa rin sa Estados Unidos dahil lagi naman nitong nakukuha
ang gusto mula sa rehimen sa pamamagitan ng mga kasunduang ehekutibo at
lehislasyon. Napapasunod ng Estados Unidos ang rehimen sa "free market globalization"
at "war on terror" na sa katotohanan ay US war of terror.
Ito lang po muna at malaya po kayang magdagdag ng iba pang bagay na
hindi ko natanong.
Sagot: Nanawagan ako sa lahat na ng ating kababayan at mga
organisadong pwersa na makayaban at progresibo na ibayong maging matatag at
militante sa paglaban sa rehimeng US-Arroyo para isulong ang pambansang kalayaan
at mga demokratikong layunin ng sambayanang Pilpino.###
|
|