|
BRIEF MESSAGES & LETTERS, 2001 - Present |
|
|
Iti Aldaw Kordilyera 2009 ni Prof. Jose Maria Sison Chairperson, International League of Peoples' Struggle Abril 23, 2009 Babaen ti International Coordinating Committee ken amin a miembro nga organisasyon ti Internasyunal a Liga ti Pannakidangadang ti Umili (International League of Peoples' Struggle - ILPS), idanon ko ti kabaraan a mamagkaykaysa a kablaaw iti Cordillera Peoples Alliance (CPA) ken iti nalawa a masa ti umili iti rehiyon iti maika-25 nga Aldaw Kordilyera iti Abril 23 ken 24. Iti diwa ti sangalubungan nga anti-imperyalista a panagkaykaysa, makipaglagip kami kadakayo iti panangisakripisyo ti biag ni Ama Macliing Dulag a pinapatay dagiti pwersa ti imperyalismo ken terorismo ti estado idi Abril 24, 1980 gapu iti panangsuppiat na ti Chico River Dam a proyekto ti World Bank a mangpadisi kadagiti nainsigudan nga umili manipud kadagiti daga da, maperdi dagiti biag ken kultura da; ken dagiti daga, mineral, bakir, danum ken dadduma pay a rekurso ket maited kadagiti ganggannaet a korporasyon ken lokal a mananggundaway a dasig ti dadakkel a kumprador ken appo't daga. Iti dayta a rabii, ti kadua ni Dulag a ni Pedro Dungoc ket nakalasat iti atake ken gapu ditoy timmipon iti Baro a Buyot ti Umili. Adu ti kontribusyon na iti panagdur-as ti gubat ti umili iti intar ti nainsigudan nga umili agingga iti nabannuar a pannakatay na a kas Nalabbaga a mannakigubat. Idaton mi ti kangatuan a pammadayaw kadagiti amin a martir ken bannuar a nangidaton ken agtultuloy a mangidatdaton ti kangatuan a sakripisyo iti pannakidangadang ti umili ti Kordilyera para iti bukod-a-panagkeddeng ken rehiyunal nga awtonomiya, para kadagiti ancestral a karbengan iti daga ken rekurso ken iti amin a dadduma pay a karbengan. Dakami iti ILPS ket determinado ken sireregta a sumupsuporta iti umili ti Kordilyera iti pannakidangadang iti amin a karbengan da segun iti nailian a wayawaya ken demokrasya para iti umili a Pilipino kasta met iti uneg ti sakup ti Sangalubungan a Deklarasyon iti Karbengan ti Tao (1948), ti Internasyunal a Tulagan mainaing (? maipanggep) iti Karbengan a Sibil ken Politikal (1966), ti Internasyunal a Tulagan mainaig (?) iti Ekonomya, Karbengan iti Gimong ken Kultura (1966) ken ti Deklarasyon ti United Nations para iti Karbengan ti Nainsigudan nga Umili. Saluduan ken kablaawan dakayo amin dita CPA iti agtultuloy a pigsa ken naurnong a gapuanan iti panangitandudo, panangsalaknib ken panangiyabante kadagiti karbengan ti umili ti Kordilyera laban kadagiti mananggundaway ken manangidadanes nga interes dagiti imperyalista, dadakkel a kumprador-appo't daga ken dagiti nangangato a kurap a burukrata nga agdama nga idadauluan ti agturturay a bunggoy ni Arroyo. Agtultuloy ti panagraira yo iti sango ti nakaro a karit ken nadangkok nga atake kadakayo dagiti natuturay a lumablaban kadakayo gapu iti natibker a determinasyon yo, kinatured, kinainget, kinamilitante a pannakidangadang yo ken iti diwa ti bukod-a-panagsakripisyo iti panagserbi ti umili. Ipagpannakkel mi nga adda ti CPA kas mangidadaulo nga organisasyon para iti Commission 10 ti ILPS mainaig iti Karbengan ti Nainsigudan nga Umili, Nailian a Minorya ken Umili para iti Bukod-a-Panagkeddeng ken Panangikkat ti Diskriminasyon (Decolonization against Discrimination), Panagpannakkel iti bukod a puli ken pananggura iti dadduma (Racism), ken Nailian a Panangidadanes dagiti Imperyalismo ken Lokal a Reaksyon. Inyeg yo iti ILPS ti nabaknang a kapadasan yo iti naballigi a panangidaulo ti pannakidangadang ti umili ti Kordilyera ken ti panangiyabante kadagiti relasyon a pannakikaykaysa ken mutwal a suporta kadagiti dadduma nga umili. Agyaman kami ta ita a tawen ket iyaramid yo ti naragsak ken napateg a selebrasyon ti Aldaw Kordilyera babaen kadagiti innadal a tungtungan ken aktibidades iti kultural iti lima a nagduduma a panagtitipon iti Abra, Baguio ken Benguet, Kalinga ken Apayao, Ifugao ken Mountain Province, imbes nga iselebrar iti maymaysa laeng a panagtitipon iti intero a rehiyon a kas iti napalabas a tawtawen. Daytoy baro a panagdur-as ket mangipakita ti umab-abante a kabaelan yo. Maikkan gundaway ti ad-adu a tao iti intero a rehiyon a dumar-ay kadagiti selebrasyon ken ti nadumaduma a probinsya ket mangaramid ti bukod da a tema batay kadagiti partikular a kasasaad, problema ken isyu da. Kagiddan na, amin a partikular a tema ket lalaunen ti sentral a tema: "Papigsaen ti panagkaykaysa ti umili. Pairtengen ti pannakidangadang para iti daga, biag ken karbengan," Daytoy a panawagan ti panagkaykaysa ket panawagan metten ti panagtignay. Ti umili ti Kordilyera ket rumbeng a tumakder kas maymaysa a sarangeten dagiti problema ti panaggundaway ken panangidadanes a sagsagrapen da iti intero a rehiyon ken iti tunggal probinsya. Dagitoy a problema ket manipud iti malakolonyal ken malapyudal a galad ti gimong a Pilipino. Dagiti solusyon ket makita iti intar ti pannakidangadang ti umili para iti nailian a wayawaya ken demokrasya. Maibilang kadagiti nasken unay a sanguen nga isyu ket dagiti awan sarday a panangtakaw dagiti ganggannaet ken lokal a korporasyon ti minas kadagiti rekurso ti nainsiguda a daga; dagiti kumarkaro a panaglabsing ti karbengan ti tao; dagiti panangiluges iti batayan a karbengan iti pangkabiagan ken pagimbagan; ti gandat a panangamendar ti 1987 a konstitusyon para iti pagimbagan ti agturturay a bunggoy ken dagiti imperyalista nga amo na; ken ti nakaro nga epekto ti napardas a kumarkaro a krisis ti agpada a kapitalista a sistema ken ti lokal nga agturturay a sistema. Sitatalek kami a dagiti panagtutungtong ti CPA iti nadumaduma a probinsya ket agresulta kadagiti resolusyon ken plano iti panagtignay a mangsango kadagiti isyu kadagiti wagas a kongkreto ken iti uneg ti sentral a tema. Isu a ti intero ken tunggal paset ti CPA ket makabael a mangriing, mangorganisa ken mangmobilisa ti umili iti panagprotesta kadagiti kinaawan hustisya, iti manangirupir kadagiti dawat ken panangiturong ti tignayan para iti nailian ken pangkagimungan a wayawaya iti baro ken nangatngato a tukad. Namnamaen mi a ti CPA ket itultuloy na ti naballigi a panangitandudo kadagiti rebbengen na, pumigsa pay ken lallalo nga umabante iti panagserbi na iti umili ti Kordilyera. Ti CPA ken ti umili ti Kordilyera ket agtultuloy a makagun-od kadagiti daddadakkel a balligi gapu ta ti panggep yo ket nainkalintegan ken gapu ta rumimrimbaw kayo iti pannakidangadang. Dagiti kabalubal yo ket agsagsagrap ti kumarkaro a krisis ken lablabanan ida ti umili dita rehiyon yo, iti intero a Pilipinas ken intero a lubong. Laklak-amen yo ti naruay a suporta manipud iti umili a Pilipino ken umili iti lubong. Ti International League of Peoples' Struggle ket agyaman kadakayo iti kinainget ken kontribusyon yo iti panangiyabante ken panangpapigsa iti sangalubungan a panagkayskaysa iti uneg ti anti-imperyalista ken demokratiko a linya babaen ti panagsango yo iti panangitadudo, panangsalaknib ken panangiyabante kadagiti karbengan ti nainsigudan nga umili, nailian a minorya ken umili para iti bukod-a-panagkeddeng ken panangikkat ti diskriminasyon, panagpannakkel iti bukod a puli ken pananggura iti dadduma, ken nailian a panangidadanes dagiti imperyalismo ken lokal a reaksyon . Agbiag ti umili ti Kordilyera! Agbiag ti Cordillera Peoples Alliance! Agbiag ti Pilipinas ken ti lubong!
|
|