|
|
Mensahe ti Pannakikaykaysa kadagiti Umili ti Kordilyera
iti Okasyon ti Maika-24 a Selebrasyon ti Aldaw Kordilyera
Ni Prof. Jose Maria Sison
Chairperson, International Coordinating Committee
International League of Peoples' Struggle
Kas panangibagi iti International League of Peoples' Struggle (ILPS), kayat ko
nga idanon kadakayo ti kabaraan a kablaaw iti pannakikaykaysa kadagiti umili
ti Kordilyera, iti Cordillera Peoples Alliance (CPA), Kakailian Salakniban Tay'
Amin a Nagtaudan (KASTAN) ken ti Baay-Licuan Takderan Omnu a Karbengan
(BALITOK). Kasta met kadagiti delegado manipud kadagiti sanga ti CPA ken
kadagiti sangaili manipud iti Pilipinas ken ballasiw-taaw iti okasyon ti maika-24
a selebrasyon ti Aldaw Kordilyera.
Makikaykaysa kami kadakayo iti panangselebrar ti aldaw nga addaan dakkel
a kinapateg iti umili ti Kordilyera, ti Pilipinas ken ti intero a lubong. Napadayawan
daytoy nga aldaw babaen iti panangibuwis ti biag ni Ama Macliing Dulag idi Abril
24, 1980 ken babaen iti amin a napapateg a sakripisyo ken pannakidangadang
dagiti umili ti Kordilyera kontra kadagiti dakes a gandat dagiti imperyalista ken
neokolonyal nga aso-aso nga estado a manglabsing iti karbengan ti umili kadagiti
nagtaudan a daga da ken iti bukod a panagkeddeng, ken ti panagsamsam ken
panagtakaw iti natural a kinabaknang ti Kordilyera.
Ituloy tayo ti agselebrar ken aramiden tayo nga inspirasyon dagiti balligi ti umili
ti Kordilyera laban iti Chico River Basin Hydroelectric Dam Project a pinonduan
ti World Bank ken ti Cellophil Resources Corporation. Dua dagitoy a mamaggundaway
unay a proyekto ti pasista a diktadura ni Marcos ken dagiti amo na nga imperyalista.
Intultuloy tayo a pinabaro ti determinasyon ken pinaregta tayo ti bileg tayo tapno
rupaken ti tunggal panggep dagiti imperyalista ken aso-aso da nga agparigat ken
aggundayaw kadagiti umili ti Kordilyera, agkunniber ken agsamsam kadagiti natural
a kinabaknang ken agdadael iti aglawlaw da.
Saluduan mi ti CPA, dagiti sanga na, dagiti alyado nga organisasyon ken gagayyem
iti natibker a komitment da, iti kinalaing ken kinatured da iti panangselebrar ti
Aldaw Kordilyera 2008 babaen iti agallangugan a panagawag "Rupaken ti Panagsamsam
dagiti Minas ken Terorismo ti Estado!" Makita daytoy a kinalaing ken kinaturedda
babaen iti panaguummong iti mismo lugar a no sadinno adda dagiti lokal ken
ganggannaet a dadakkel a kumpanya ti minas nga aggaganaet nga agar-aramid
ti operasyon ken eksplorasyon ti minas ken no sadinno a naideploy ti sumagmamano
a batalyon ti reaksyunaryo a buyot tapno salakniban dagiti kumpanya ti minas ken
butengen dagiti nainsigudan nga umili ken dagiti agselebrar ti Aldaw Kordilyera.
Adda ti nasinged, nasken ken agtinnulong a relasyon iti baet ti panagkunniber ti
minas ken terorismo ti estado. Sigud a relasyon daytoy iti baet ti pananggundaway
ken pammarparigat. Dagiti dadakkel a kumpanya ti minas ket aggamgamgam ti
balitok, gambang, pirak, magnetite ken dadduma pay a mineral a kinabaknang
manipud iti 1.2 milyon nga ektarya wenno 66 porsyento ti Kordilyera. Isu a babaen
ti Oplan Bantay Laya, indeploy ti estado iti sumagmamano a brigada ti army ken
brigada a mobile ti pulis ti nasyunal iti intero a Kordilyera.
Ti ngumatngato a tukad iti panagkunniber ti minas iti Kordilyera ken iti amin a
Pilipinas ti pakakitaan iti kinatulnog ti rehimen nga Arroyo iti polisiya ti US nga
"neoliberal a globalisasyon." Awanan patingga ti rehimen nga agut-utang iti
ganggannaet ken lokal tapno kalubanna dagiti depisit ti eksport-import ken badyet,
ilemmengna iti panagsuwek ti ekonomya ken kina-bangkarote, ken ipakita ti saan
nga agpayso nga ilusyon ti panagdur-as ti ekonomya iti sumagmamano a tawen.
Pinalubusan na dagiti ganggannaet a korporasyon nga agtagikua kadagiti negosyo,
pribatisayon kadagiti sanikua ti estado, panagsamsam ken panagtakaw kadagiti
natural a kinabaknang ken ti saan nga umno a panangusar kadagiti patulod a
dolyar dagiti OCW kas wagas tapno mapagustuan dagiti ganggannaet a monopolyo
ken bangko.
Ti ngumatngato a tukad iti terorismo ti estado ken panaglabsing iti karbengan ti
tao iti pakakitaan ti kinatulnog ti rehimen nga Arroyo iti polisiya ti US a sangalubongan
a terorismo ken pananglipit kadagiti kontra-imperyalista nga estado, tignayan a
mangwayawaya ti pagilian ken dagiti progresibo nga organisasyon ken lider babaen
ti panagpammarang a panangrupak iti terorismo. Ti sangalubungan a gerra iti
terorismo ti US, pakaibilangan ti manupaktura ken panagmonopolyo kadagiti
armas a makapatay ti masa, panangisayangkat kadagiti mamangsakop a gerra
ken panangitandudo ti terorismo ti estado kas polisiya dagiti imperyalista ken
aso-aso nga estado. Inadoptar ken insayangkat ti rehimen nga Arroyo ti terorismo
ti estado tapno makaala ti suporta a militar manipud iti US, mangbutbuteng ken
mangatake iti oposisyon ken mapabayag ti iggem na a turay nga illehitimo.
Nupay kasta, ti nalawa a masa ti umili a Pilipino ken ti nalawa a nagkaykaysa a
prente ti organisado a ligal a puersa, agpurpursige a pagtalawen ti rehimen
nga Arroyo babaen ti panangipatungpal iti demokratiko a karbengan da nga
agsao ken agummong. Nauma dan iti kina-papet ti rehimen kadagiti imperyalista
nga interes, napalalo a korapsyon, dagiti kusit nga eleksyon ken nakaro a
panaglabsing iti karbengan ti tao. No saan nga umanay dagiti umarinuor nga
iskandalo a korapsyon ti rehimen tapno mapatalaw ti rehimen, ti napardas a
panagkaro ti sigud a nagsuwek nga ekonomya, ti kellaat a panagbaba ti empleyo
ken birok, ken dagiti ngumatngato a presyo ti gasolina, makan ken dadduma pay
a nangnangruna a kasapulan ti lallalo a mangiduron iti umili tapno rippuogenda ti
rehimen.
Uray laksid ti pungtot dagiti umili iti rehimen agpatuloy pay ti panagturay babaen
iti panagusar ti narungsot a puersa militar, ti armado a rebolusyonaryo a tignayan
ti umili iti intar ti nailian ken demokratiko a linya iti agrimat kas kadakkelan a
namnama ti umili para iti panangrippuog saan laeng a ti rehimen nga Arroyo no
di met uray pay ti intero a malakolonyal ken malapyudal nga agturturay a sistema.
Naan-anay ti pannakapaay ti Oplan Bantay Laya iti gandat na a lappedan ti gubat
ti umili. Nangiduron laeng daytoy iti umili a mangiwayat ti armado a rebolusyon.
Allukuyen mi dakayo nga umili ti Kordilyera a papigsaen ti puersa yo ken pairtengen
ti amin a bileg yo nga intandudo, salakniban ken iyabante dagiti karbengan yo iti
nagtaudan a daga ken bukod a pangkeddeng, demokrasya, hustisya ti gimong,
panagdur-as babaen ti bukod-a-kabaelan, nasalun-at nga aglawlaw ken ti
panangkonserba iti natural a kinabaknang para iti panagdur-as ti masakbayan nga
agwaywayas kadagiti imperyalista ken reaksyunaryo. Supsuportaran mi ti dangadang
yo kontra iti mananggundaway ken mamarparigat iti wagas a komprehensibo ken
manipud iti kaunggan mi. Makikaykaysa kami kadakayo kontra iti panagkunniber
dagiti minas tapno agsamsam ken terorismo ti estado.
Dakkel ken nalawa unay ti kangrunaan ken kaipapanan ti dangadang yo. Inspirasyon
daytoy ken dakkel ti kinapateg na para iti dangadang ti amin nga umili a Pilipino ken
ti umili iti lubong para iti nailian ken panggimong a wayawaya kontra iti imperyalismo
ken reaksyon. Awisen mi dagiti organisasyon yo a mangipatulod kadagiti delegasyon
iti umadanin a Maikatlo nga Internasyunal nga Asembleya ti International League of
Peoples' Struggle iti Hong Kong inton Hunyo tapno ibingay yo dagiti kapadasan ken
pakaseknan ken mangisingasing kadagiti resolusyon ken maikeddeng dagiti addang
para iti panangiyabante ti dangadang yo a maikumpas kadagiti dangadang ti umili iti
lubong.###
|
|